7 liedjes
scroll naar beneden voor de teksten
– Ballade van ’t goje laeve (De Driestuver Opera)
– Ballade wo in MacHeath ederein óm verguffenis vreug (De Driestuver Opera)
– Bang det ich wakker waer (Wiejer Kieke, Aope Deure) Spotify YouTube
– Barbara song (De Driestuver Opera)
– Betraond papier (Inruulwaar) YouTube
– Biets oppe tenj (Wiejer Kieke) YouTube
– Breef van de Zjwaam
Ballade van ’t goje laeve
Uit: De Driesjtuver Opera (2012)
Tekst: Bertold Brecht
Muziek: Kurt Weil
Vertaling: Ton Custers
–
(Macheath)
Me zaet det v’r de wieze mótte ere,
Die leave mit ‘n book en nieks te sjnaje,
In ‘n klein huuske, wo ze ratte haje
Noe zègk toch zelf waat kinse dao van lere!
Eenvoudig laeve, num mer det besjloet!
Mer nae, veur mich is det toch gaaroet nieks.
Gein veugelke, es se ’t good bekieks,
Heel zo get ouch mer eine daag lang oet.
Kees doe veur vrie zeen? Ich, ich gaon veur meer.
Allein dae laef in waelj laef mit plezeer!
En den die luuj die väöl wille belaeve
Gaon door ‘t vuur, veur det waat zie gaer wille
Die häöre hang nao waorheid wille sjtille
En dao God weit waat den veur wille gaeve
Es se den zuus, wie det, es ‘t ’s aoves vruus
Mit ‘n kaat vroumes sjtil ’t bèd in geit
De kop allein mer richting toekoms sjteit
En baejt, det d’r de haop mer neet verluus
Den vreug se dich toch aaf: gaon die veur meer?
Allein dae laef in waelj, laef mit plezeer!
Ich zól mich zelf heel good kinne begriepe,
Es ich mich lever groots en einzaam zoog noe.
Mer zeen ich van die luuj, doon ich de uig toe,
Dan zègk ich mich: zo wil ich neet versjliete.
Ermooj bringk naeve wiesheid ouch väöl sjtróndj.
En dapper zeen bringk eer mer kós dich zjweit
En bös se erm en einzaam, vol mit leid,
Den haat euver det groots zeen ‘ns de móndj.
Den zuus se wie ‘t mót in eine keer
Allein dae laef in waelj, laef mit plezeer!
Ballade wo in MacHeath ederein óm verguffenis vreug
Uit: De Driesjtuver Opera (2012)
Tekst: Bertold Brecht
Muziek: Kurt Weil
Vertaling: Ton Custers
–
Macheath
Geer luuj wo van de sjtum nao mich nag klink
Laot estebleef, veur mich, eur hert ouch sjpraeke
En lach neet, es men mich de sjtrop óm hingk
Dae lach in eure voes, en gangk neet praeke
Vervlook mich neet es geer mich den zeet hange
Bön neet verbitterd zo wie ‘t gerech
Want ederein is soms toch waal ‘s sjlech
En miense weit, ich bön uch veur gegange
Geer luuj laot mich veur uch ’n les noe zeen
Baej det bie God, vergaeving ich verdeen.
De raege was ós sjoon,’t lief, de sjnoet
En was ‘t vleis det volgevraete is
Det alles haaj, en toch nog sjteeds get mis
De rave hakke ós de uig al oet
‘t is ós ech noe nao de kop gesjtege.
Drek hange veer hie mit dae’n euvermood
De veugel pikke, drinke van ós blood
Wie paerdekeutels, gans zjwart van ne vlege
Geer luuj laot mich eur waarsjuwing mer zeen
Baej det bie God, vergaeving ich verdeen.
Da maedjes die mit borste prónke
Óm kaerels aan häör vas te binje.
Die vlaegels die nao häör den lonke
Óm ‘t gelök bie häör te vinje.
De sjojer, hore, horelouper
de poojer, mäörder en de deef
De oplichter, de lóch verkouper
Ich vraog vergaef mich estebleef
Mer neet de woute die dao wachte
Die eedre aovendj, edre morge
Allein ’n kors te aete brachte
En verder nieks es leid en zorge
Vervloke mós ich die half gare
Mer deje zie neet ouch häör plich
Óm nach meer ózel mich te sjpare
Vraog ich aan häör, vergaef ’t mich
Haop det dae murf, wo zie mit aete
Mit eine hamer waerd doorkleef
En verder wil ich noe vergaete
Ich vraog vergaef mich estebleef
Bang det ich wakker waer
Van: Cd Aope Deure (2008)
Tekst en muziek: Ton Custers
Spotify
YouTube
–
Bang óm aaf te sjtaon waat d’r nag neet is
haaj ich vas aan de druime die ich mis
en ich loup nach sjteeds veurzichtig óm dich haer
bang det ich wakker waer
’t Woor de eerste keer det ’t mich emes zach
wo ich zelf zo lange tied op haaj gewach
en ich fluuster sinds dae daag get veur mich haer
bang det ich wakker waer.
En wie ich ouch d’r taenge vech
ich zink d’r langzaam aan in weg
of is det waat ich ’t leefste mit dich wil
Ich blief haope oppe wiezer dae dao drejt
toet veur allebei de tied ’t zelfde sjteit
zónger waat of waem den ouch te kort te doon
Barbara song
Uit: De Driesjtuver Opera (2012)
Tekst: Bertold Brecht
Muziek: Kurt Weil
Vertaling: Ton Custers
–
(Polly)
Ooit gluifde ich, wie ich nag ónsjöldig waar,
en ich waar eins wie dich, klein en sjtil.
Mesjien kump ouch nao mich waal ‘ns eine,
en dan mót ich wete, waat ich wil.
En es d’r geldj haet, en es d’r sjiek is,
en zien haemp zit dök zat inne was
En es d’r wèt, wie mit ‘n dame óm te gaon,
dan zègk ich toch nag, pas
Dan verluus se diene kop toch neet, haols neet alles oet de kas
Zeker sjient de maon de ganse nach
Zeker waerd de boot mit touwe vasgelach
Neet väöl wiejer geit de sjpas
Jao, dan kin se toch neet zo mer ligke gaon
Jao, dan blief se keul en paks de jas
Jao, dan kós hie zo väöl gebeure
mer, ouch dan zaes se toch weer, pas
De eerste, dae kwaam, waar dae man oet Kent,
dae waar, zo wie hae mós zin
De tweede dae haaj op zien mins drie sjtrepe,
en de derde waar ouch neet min.
En wie ze geldj haje, en wie ze sjiek ware,
en häör haemp zoot dök zat inne was
En wie ze wiste, wie mit ein dame óm te gaon,
toen zag ich häör toch nag, pas
Toen verloor ich miene kop toch neet, leet toch alles inne kas
Zeker sjient de maon de ganse nach
Zeker waar de Boot mit touwe vasgelach
Neet väöl wiejer ging dan de sjpas
Jao, dan kin se toch neet zo mer ligke gaon
Jao, dan blief ich keul en pak de jas
Jao, dan kós toch zo väöl gebeure
mer, ouch dan zaes se toch weer, pas
Mer op ‘ne daag, en de loch (die) waar blau,
kwaam eine, dae gaar nieks vroog.
Hae hing zo mer ziene hood aan dae Nagel in mien kamer,
en ich merkte det ich nieks meer zoog.
En wie d’r gein geldj haaj toen, en wie d’r neet sjiek waar,
en zien haemp det mós al waeke inne was
En wie d’r neet ech wis, wie mit ‘n dame óm te gaon,
toch zag ich bie hem neet, pas
Nae toen haaj ich geine klaore kop meer, haolde alles oet de kas
Zeker sjeen de maon de ganse nach
En de boot vertrok en dreef toen door de nach
En d’n aovendj droop toen van de sjpas
Jao dan mós se dich toch zo mer ligke gaon
Jao, dan blief ich toch neet keul en pak de jas
Jao, toen mós toch zo väöl gebeure
jao, ich zag zeker toen gein, pas
Betraond papier
Van Cd: Wiejer Kieke (1997)
Tekst en muziek: Ton Custers
YouTube
–
Hie zit se wiet van hoes en druims van wie ’t dao noe is
Nao 15 jaore wèrke wèt se neet good meer waasse mis
Allein nag waat dao vreuger woor
en waas se eins in ’t jaor dao effe zuus.
Doe kwooms hie veur zo lange tied en haajs toen krach veur 10
En noe kènsse de zjwarte door de gries haor neet meer zeen
en vreugs dich aaf waat of de zin d’r van woor
doe vónjs hie nieks nuuts.
Noe sjriefsse breve desse ’t höbs gemaak
en hie sjient altied de zón
Vergits veur ’t gemaak det de wintjer net begón
En dien kinjer die se 6 keer höbs gezeen
zaes se elk op häör manier
Nag effe de groete, op betraond papier.
Doe kals nag euver toes mer wèts zelf al neet meer wo det is
Is det hie of dao achter woosse dich ooit ‘ns höbs vergis
door te dinke det ’t hie zóväöl baeter
en diene haop op toekoms woor
Doe waers nag net getolereerd, mer ’t sjtik dich es se zuus
desse door de meiste luuj toch in ’t heukske waers geduujd
van wo det es ’t toch den mót de klappe valle gaon
doe zjwiegs en löps door.
Biets oppe tenj
Van Cd: Wiejer Kieke (1997)
Tekst en muziek: Ton Custers
YouTube
–
Zittend wachtend op ’t aafsjied,
ich mós nag zóväöl dinge kwiet.
Zóväöl vraoge wo ’t antjwaord nag op wach,
zóväöl dinge neet gezag.
Gelökkig det geveul van neet veur altied,
mer noe det bösse kwiet.
Biets oppe tenj en gufs dae handj,
doe kieks mer sjnel nao ‘ne angere kantj.
Wils neet det angere ’t in dien ouge zeen.
Sjtóm, doe kieks mer neet meer óm.
Wetend det de tied te kort is,
wètse desse toch wäörd mis.
Óm te zègke waas se eigelik zous wille,
óm ’t toch mer get te sjtille.
Wèts ouch neet van wanneer den weer,
mer wachs noe al op dae keer.
Breef van de Zjwaam
Tekst en muziek: Ton Custers (2014)
–
Béste miense, Zwamer luuj, hie ’n klein liedje van de Zjwaam
Ich haop det emes dit wilt zinge en vertèlt oet miene naam
Wie ich van miene kantj oet alles höb gezeen en höb belaef
Zeet ’t mer es miene kiek op Zjwame dae ich gaef
Ich höb gezeen, ich höb geloesterd en toet noe toe ouch gezwege
Mich gedrejd in alle bochte, en toch nooit ech hove lege
altied miene waeg gevónje mit de sjtruiming mit gegaon
Väöl gegaeve, soms genaome, waat ich doon mós ouch gedaon
De eerste miense die ich zoog det is verdompde lang geleje
De klei de bosse en de hei det is waat ich die luuj kós beje
De Romeine zoog ich kómme en ich zoog ze ouch weer gaon
Ich höb häör sjtevele gesjpeuld wie zie in’t water ginge sjtaon
Wie later Franke, Keizer Karel en de Noormanne hie kwome
Sjteeds meer luuj hie in de buurt en aan mien oevers kwome wone
Waerde väöl van mich gedrónke waerde väöl van mich verwach
En ich heurde waat d’r euver al die luuj waerde gezach
Dao is gesjoemeld en gehanjeld en gevochte óm mien landj
En door de jaore haer ging ich net get te väöl van handj nao handj
De Sjpanjaarde, de Franse, de Pruse en ouch Oostenriek
Det wore zjwaore tieje es ich dao noe weer ’s truuk op kiek
Mer waat d’r ouch gebeurde ich kös loupe wo ich leep
Bleef gaon van Pruse toet de Maas ouch es de res van Zjwame sjleep
Ich zorgde good veur alle vèsse, veur de beeste al ‘t laeve
Want ich vinj en vonj det ich mich gans veur Zjwame toch mót gaeve
Béste miense, Zwamer luuj, ’t liedje is noe bienao klaor
Ich gluif nag altied inne toekoms ouch al is ’t soms get zjwaor
Es d’r örges weer get rotzooi of get rómmel waerd gedrop
Ich haop det det veur altied en door ederein ouch waerd gesjtop
Ich höb gezeen, ich höb geloesterd en toet noe toe ouch gezwege
Mich gedrejd in alle bochte, en toch nooit ech hove lege
altied miene waeg gevónje mit de sjtruiming mit gegaon
Väöl gegaeve, soms genaome, waat ich doon mós ouch gedaon